સુરેશ રૈનાએ જણાવ્યું, IPL-2020 છોડી ભારત પરત ફરવાનું મુખ્ય કારણ

www.vyaapaarsamachar.com

નવી દિલ્હી : ચેન્નાઈ સુપર કિંગ્સના સ્ટાર બેટ્સમેન સુરેશ રૈના અંગત કારણોસર IPL-2020 છોડી ભરત પરત આવ્યા છે. રૈનાના પાછા ફરવાના કારણો સ્પષ્ટ ન થતા ઘણી અટકળો ચાલી રહી હતી. પરંતુ હવે આ સ્ટાર ખેલાડીએ તેના પરત આવવાનું વાસ્તવિક કારણ આપ્યું છે.

અગાઉ કહેવાયુ, રૈના કોવિડના ડરે પરત ફર્યો

રૈનાના ભારત પાછા ફરવાના નિર્ણય બાદ કેટલાક એવા અહેવાલો આવ્યા હતા કે, જ્યારે ચેન્નાઈ સુપર કિંગ્સ (CSK) ટીમના કેટલાક ખેલાડીઓનો કોરોના ટેસ્ટ પોઝિટિવ આવ્યો છે, ત્યારે રૈના ડરી ગયો હતો અને તેનો ડર એટલો વધી ગયો હતો કે, તે ત્યાં રોકાવા રાજી ન થયો. તેણે કેપ્ટન એમએસ ધોની અને કોચ સ્ટીવન ફ્લેમિંગ સાથે વારંવાર વાત કરી હતી, જે બાદ તેને ટૂર્નામેન્ટમાંથી પરત મોકલવાનું યોગ્ય માનવામાં આવ્યું.

રૂમને લઈ થયો હતો વિવાદ

ત્યાર બાદ વધુ એક અટકળો સામે આવી હતી કે, રૈનાએ દુબઈની તાજ હોટેલમાં જે રૂમ અપાયો હતો, તે કેપ્ટન અને કોચના રૂમ જેટલો વૈભવી ન હતો. રૈનાના રૂમમાં બાલ્કની પણ ન હતી, તેથી રૈના નારાજ હતો અને તે ત્યાં રહીને આખી ટુર્નામેન્ટ રમવા તૈયાર નહોતો, તેથી તે ભારત પાછો ફર્યો.

શ્રીનિવાસે પણ કહ્યું, રૈનાને સફળતા માથે ચઢી ગઈ, તૂંડમિજાજી થઈ ગયો

શ્રીનિવાસને એક મોટું નિવેદન આપ્યું છે. તેમણે જણાવ્યું, ”રૈનાએ અચાનક ટીમનો સાથ છોડી દેતાં ટીમને ધક્કો લાગ્યો છે, પરંતુ કેપ્ટન ધોનીએ સ્થિતિને સંભાળી લીધી છે. ક્રિકેટરો જૂના જમાનાના તૂંડમિજાજી અભિનેતા જેવા હોય છે. ચેન્નઈ સુપર કિંગ્સ પરિવાર જેવી છે અને બધા સિનિયર ખેલાડીઓ સાથે રહેવાનું શીખી ચૂક્યા છે. આટલેથી તેઓ અટક્યા નહોતા. તેમણે વધુમાં કહ્યું, ”રૈના એપિસોડમાંથી ટીમ બહાર આવી ગઈ છે. હું સમજું છું કે જો તમે ખુશ ના હો તો પાછા ફરી જાવ. હું કોઈ પર કંઈક કરવા માટે દબાણ લાવી શકું નહીં. ઘણી વાર સફળતા તમારા માથા પર ચડી જાય છે. મારે ધોની સાથે વાત થઈ છે. કેપ્ટને મને વિશ્વાસ અપાવ્યો છે કે જો કોરોના કેસ વધી જશે તો પણ ચિંતાની વાત નથી. મારી પાસે મજબૂત કેપ્ટન છે. ધોની આવી બધી ચીજોથી બેફિકર રહે છે અને તેનાથી ટીમને ઘણો આત્મવિશ્વાસ મળે છે.”

રૈનાના સંબંધીઓ પર પંજાબમાં હુમલો

દરમિયાન રૈનાની કાકીના પરિવાર પર પંજાબના પઠાણકોટમાં કેટલાક ડાકુઓએ હુમલો કર્યો હતો. આ હુમલામાં રૈનાના કાકા પહેલા જ મૃત્યુ પામ્યા હતા, જ્યારે તેના બે કઝીન અને કાકીની હાલત ગંભીર હતી. સોમવારે રાત્રે રૈનાના પિતરાઇ ભાઇનું પણ મોત નીપજ્યું હતું અને તેની કાકીની હાલત પણ ગંભીર છે. રૈનાએ કહ્યું કે, ટૂર્નામેન્ટ છોડીને દેશ પાછા ફરવાનું આ વાસ્તવિક કારણ હતું કારણ કે આ સમયે પરિવારને મારી સૌથી વધુ જરૂર હતી.

રૈનાએ કહ્યું, CSK અને મારા વચ્ચે કોઈ વિવાદ નહીં

32 વર્ષીય સુરેશ રૈનાને જ્યારે સવાલ કરાયા તો તેમણે કહ્યું કે, સીએસકે આજે પણ મારા પરિવારની જેમ છે. તેને છોડીને દેશ પાછા ફરવાનો નિર્ણય સરળ નહોતો, પરંતુ અહીં પરિવારની વધુ જરૂર હતી અને હજુ પણ મારા અને CSK વચ્ચે ગાઢ સંબંધ છે. ધોની ભાઈ મારી જીંદગીમાં વિશેષ સ્થાન ધરાવે છે.

CSK માટે હજુ 4-5 વર્ષ સુધી રમીશે: સુરેશ રૈના

જ્યારે આ ડાબોડી બેટ્સમેને CSK સાથે વિવાદ અંગે સવાલ પુછાયો ત્યારે તેણે કહ્યું કે, ‘કોઈપણ 12.5 કરોડ રૂપિયાને આમ જ પીઠ બતાવી શકતું નથી, આની પાછળ કોઈ નક્કર કારણ હોવું જરૂરી છે. ભલે હું આંતરરાષ્ટ્રીય ક્રિકેટમાંથી નિવૃત્ત થયો છું. પરંતુ હું હજી પણ નાનો છું અને હું તેમના માટે બીજા 4-5 વર્ષ સુધી રમવા માંગુ છું.

Web Title: Suresh Raina said, the reason for leaving IPL-2020 and returning to India